Хэнтий аймгийн Улсын бүртгэлийн хэлтсийн шинэ барилгын шав тавих ёслол өнөөдөр морин цагт боллоо. Шав тавих ёслолд аймгийн Засаг дарга Ц.Идэрбат, аймгийн ЗДТГ-ын Хөрөнгө оруулалт, хөгжлийн бодлого, төлөвлөлтийн хэлтсийн дарга Э.Мөнх-Эрдэнэ, Улсын бүртгэлийн хэлтсийн дарга Б.Төрхүү тэргүүтэй албаныхан оролцлоо.
Улсын төсвийн 1 тэрбум 270 сая төгрөгийн өртөг бүхий 926 м.кв, гурван давхар тус барилгын ажлын сонгон шалгаруулалтад “Мандалт Констракшн” ХХК шалгарсан бөгөөд 2022 оны дөрөвдүгээр улиралд түлхүүр гардуулах нөхцөлтэйгөөр ажлаа эхлүүлж байна. Барилгын зураг төслийг “Зууны гүүр” ХХК зохиосон бол захиалагчийн хяналтыг аймгийн ГХБХБГ тавьж ажиллана.
Аймгийн Засаг дарга шинээр баригдах барилгыг чанарын өндөр түвшинд барьж, цаг хугацаандаа хүлээлгэн өгөх нь бүртгэлийн байгууллагад чухал болохыг онцолсон бол УБХ-ийн дарга Б.Төрхүү “2007 оноос хойш Аймгийн ЗДТГ-ын нийтдээ 176 м.кв талбайтай, 8 өрөөнд үйл ажиллагаагаа явуулж ирсэн. Жил ирэх тусам хүн ам, үйлчилгээ нэмэгдсэнтэй холбогдуулж, үйлчилгээ үзүүлэх, архивын хадгалалт хамгаалалтад эрсдэл учирч болзошгүй байна. Хэнтий аймгийн 80 мянга шахам хүний нотлох баримтууд цаасан хэлбэрээр хадгалагдаж байдаг. Нэгдүгээрт хадгалалт хамгаалалтын өрөө тасалгаа багассан, хоёрдугаарт иргэдэд үйлчлэх үйлчилгээний төвийн багтаамж багатай. Өдөрт 80-100 хүн үйлчилгээ авдаг. Ковидын үед үйлчилгээ үзүүлэхэд хүндрэлтэй. Шинэ барилга баригдсанаар иргэдэд үйлчлэх үйлчилгээний стандарт сайжирч, цахим үйлчилгээ, архивын хадгалалт хамгаалалт найдвартай болно гэв.
