Өнгөрсөн жил улсын бүртгэлийн байгууллага үүссэний түүхт 80 жилийн ой тохиосон. Энэ хүрээнд Хэнтий аймаг дахь улсын бүртгэлийн хэлтсээс эрдэм шинжилгээний бага хурал, албан хаагчдынхаа нийгмийн орчинг сайжруулах, бүтээлч ажлын аян өрнүүлэх гэх мэт 10 гаруй ажил төлөвлөн хэрэгжүүлжээ. Энэ хүрээнд “Хэнтий аймаг дахь улсын бүртгэлийн хэлтсийн үйл ажиллагааны эмхэтгэл” 2015-2020 номын нээлт өнөөдөр боллоо. Тус номын нээлтэд аймгийн ЗДТГ-ын дарга Ж.Ганбаатар, Хууль, эрх зүйн хэлтсийн дарга Б.Дарханбаатар, Архивын тасгийн дарга Б.Мөнгөнцэцэг, Улсын бүртгэлийн хэлтсийн дарга Б.Төрхүү болон тус хэлтсийн ажилтнууд оролцлоо.
Улсын бүртгэлийн хэлтсийн дарга Б.Төрхүү Мэдээллийн ил тод байдал ба мэдээлэл авах эрхийн тухай хуулийн хэрэгжилтийг хангах, Улс бүртгэлийн багц хуулиудын шинэчлэл, ойлголтууд, иргэний бүртгэлийн цахим шилжилт, хууль тогтоомжийн хүрээнд гарч буй зөрчлийг багасгасан байдал, ахиц амжилтуудаа түгээх ач холбогдолтой хэмээж, тав, таван жилээр үйл ажиллагаагаа эмхтгэл хэлбэрээр гаргаж хэвшиж байна гэлээ.
Анх 2015 онд тус хэлтсийн түүхэн замнал, үе үеийн ажилчид, бүртгэлийн байгууллагын цадиг түүхийг харуулсан анхны эмхтгэлийг гаргаж байжээ.
Тус номыг УБХ-ийн Иргэний бүртгэлийн тасгийн дарга Ш.Мөнхзулаар ахлуулсан ажлын хэсэг хоёр сар гаруйн хугацаанд бэлтгэсэн бөгөөд хэвлэлтийн зардал болох 3,5 сая төгрөгийг аймгийн ЗДТГ-аас шийдвэрлэж өгчээ. Аймгийн ЗДТГ-ын дарга Ж.Ганбаатар жишиг болохуйц ном болсныг онцлоод, амжилт хүслээ. Мөн үеэр ном бүтээх ажлын хэсгийн ахлагч Ш.Мөнхзулд талархал, өнгөрсөн жилийнхээ амжилтаар "Шилдэг ажилтан" болсон улсын ахлах бүртгэгч Ц.Соёл-Эрдэнэд өргөмжлөл, мөнгөн шагнал гардууллаа.
Ташрамд дуулгахад Хэнтий аймаг бүх сумаа 2017-2020 онд иргэний бүртгэлийн мэдээллийн нэгдсэн сүлжээнд холбосон бөгөөд иргэд 10 гаруй төрлийн үйлчилгээг цахимаар авч хэвшжээ.
ХЭНТИЙ АЙМГИЙН ЗДТГ
